​ADP fəalı Niyazi Qurban azadlığa buraxıldı

08 aprel 2017-ci il tarixində Milli Şuranın “Yalana, Talana və Monarxiyaya yox!” şüarı ilə keçirilən mitinqdə aktiv iştirak etdiyinə və həmin mitinqə insanları cəlb etdiyinə görə mitinqdən sonra təqib və təzyiqlərə məruz qalan və 09 aprel tarixində axşam saatlarında mülki geyimli şəxslər tərəfindən naməlum istiqamətə aparılan ADP-çi Niyazi Qurban azadlığa buraxılıb. Qeyd edək ki, Niyazi Qurban ADP-nin fəal üzvlərindəndir. Özünün saytımıza verdiyi məlumata görə o, 2 gün tanımadığı yerdə saxlanılaraq işgəncələrə və qeyri-insani rəftara məruz qalıb. Saxlanıldığı müddətdə ondan mitinqlərə qatılmamaq, siyasi fəaliyyətini dayandırmaq və insanlar arasında dövlət orqanlarını nüfuzuna xələl gətirən təbliğat aparmamağı tələb edilib. Niyazi Qurban bildirib ki, ona qarşı sərt və kobud ifadələr işlədilib, iki gün soyuq, pəncərələri şüşəsiz, istilik sistemi işləməyən, yataq şəraiti pis olan otaqda saxlayıblar.
Qeyd edək ki, baş verən hadisə hakimiyyət orqanlarının Niyazi Qurbana göstərdiyi növbəti haqsızlıqdır. O, bundan qabaq da siyasi fəaliyyətinə və müxalifətin təşkil etdiyi mitinqlərdə aktiv iştirak etdiyinə görə dəfələrlə müxtəlif polis bölmələrinə və idarələrinə aparılaraq təqib, təzyiq, işgəncə və qeyri-insani rəftara məruz qalmış, dəfələrlə inzibati qaydada həbs olunmuşdur.
Məlumdur ki, Niyazi Qurbanın bu cür qanunsuzluqlarla üzləşməsi onun ADP-çi olaraq fəal siyasi mübarizəsi və müxalifətin təşkil etdiyi kütləvi aksiyalarda aktiv iştirakı, həmin aksiyalara insanları cəlb etməsidir. Şübhəzis, Niyazi Qurban kimi müxalifətçilərin fəallığı hakimiyyət orqanlarını narahat etdiyindən bu insanlara qarşı daim təqib kampaniyası davam etdirilir.