Adil İsmayılovdan şikayət edən vəkil həmkarı AÇIQLAMA YAYDI - "Öz vəkil həmkarları barəsində “qul”, “kölə”, “mağmın”, “şərəfsiz” kimi..."

Baxış sayı:
146

Dünən Vəkillər Kollegiyasının qərarı ilə Adil İsmayılov vəkillikdən uzaqlaşdırılıb.

Bu barədə məlumat mətbuat orqanlarında dərc olunsa da Adil İsmayılov məsələyə hələ də aydınlıq gətirməyib.

Bununla belə, Adil İsmayılovun vəkil həmkarı Sahil Quliyevin şikayəti əsasında vəkilliyinə xitam verdiyi aydınlaşıb. Sahil Quliyevin özü də saytımıza göndərdiyi bəyanatda faktı təsdiq edib, şikayətinin səbəbini belə açıqlayıb:

“Kütləvi informasiya vasitələrinin  çoxsaylı telefon zənglərini nəzərə alaraq, vəkil Adil İsmayılovun vəkillik fəaliyyətinin  bir il müddətinə dayandırılması ilə əlaqədar Vəkillər Kollegiyasının Rəyasət Heyətinin qərarı ilə bağlı mətbuatda dərc edilən yazılarla əlaqədar aşağıdakıları nəzərinizə çatdırmaq istəyirəm:

Vəkil Adil İsmayılov öz “Facebook” səhifəsində müxtəlif vaxtlarda vəkil həmkarlarını və məni təhqir edən  yazılar paylaşmış, öz vəkil həmkarları barəsində “qul”, “kölə”, “mağmın”, “şərəfsiz” kimi şərəf və ləyaqəti alçaldan, qeyri-etik ifadələr işlədərək, vəkillər üçün məcburi olan etik davranış qaydalarını pozmuş, bu isə öz növbəsində vəkillər arasında haqlı narazılıqlara səbəb olmuşdur.  Həmin yazılarla bağlı mən və digər vəkillər – Elmar Kərimov və Tahir Əlirzayev şikayətlə Vəkillər Kollegiyasına müraciət etmişdik.

Bu şikayətlər Vəkillər Kollegiyasının İntizam Komissiyasında vəkillərin və A.İsmayılovun iştirakı ilə tam və hərtərəfli araşdırılmış və qanuna müvafiq qaydada araşdırmanın nəticələrinə dair rəy baxılması üçün Vəkillər Kollegiyasının Rəyasət Heyətinə təqdim edilmişdir.

Rəyasət Heyətinin 9 sentyabr 2019-cu il tarixli iclasında İntizam Komissiyasının sədri Şahmar Məmmədovun rəyi dinlənildikdən sonra həm vəkil Adil İsmayılov, həm də mən şikayətə dair izahatlarımızı vermişik.

Adil İsmayılov iclasda izahat verərək, “mən yazmışam, düz etmişəm, kim özünə götürür, götürsün” deməklə, şikayətə səbəb olmuş yazıların onun tərəfindən yazıldığını etiraf etsə də, həmin yazılardakı ifadələrin təhqir olmadığını bildirmişdir.

Mən isə öz izahatımda vəkillərin və mənim barəmdə Adil İsmayılovun yazılarındakı ifadələrin  Vəkillərin davranış qaydaları haqqında Əsasnamənin 2.4-cü, 5.3-cü  bəndlərinə zidd olduğunu bildirdim.

2.4.- Loyallıq - Vəkil peşə fəaliyyətini həyata keçirərkən və ya peşə fəaliyyətindən kənar davranışında vəkilliyin nüfuzunu aşağı sala biləcək hərəkətlərə yol verməməlidir. Vəkil qanunvericilikdə vəkillik fəaliyyəti ilə bağlı nəzərdə tutulmuş məhdudiyyətlərə əməl etməli, başqa vəkillərin fəaliyyəti ilə əlaqədar (qanunsuz fəaliyyət istisna olmaqla) tənqidi ictimai mülahizələrdən, çıxışlardan və onların fəaliyyətinə ictimai qiymət verilməsindən çəkinməlidir.

5.3.-Vəkil həmkarlarına münasibətdə hörmətlə davranmalı, onların şərəf və ləyaqətini alçaldan hərəkətlərə və kobud rəftara yol verməməlidir.

Rəyasət Heyətinin Sədri Anar Bağırovun barışıqla bağlı təklifinə nə Adil İsmayılov,  nə də mənim tərəfimdən müsbət münasibət bildirilmədi. 

Hətta A.İsmayılov İntizam Komissiyasının rəyi ilə razılaşaraq, fəaliyyəti dövründə bir neçə dəfə töhmət aldığını, baxılan intizam işi üzrə ona bir əlavə töhmətin verilməsinə də razı olduğunu Rəyasət Heyəti üzvlərinə bəyan etdi. 

Daha sonra Vəkillər Kollegiyasının Rəyasət Heyəti müşavirədən sonra mənim və Adil İsmayılovun iştirakı ilə “Adil İsmayılovun vəkillik fəaliyyətinin  bir il müddətinə dayandırılması barədə” qərarını elan etdi.

Mən bu gün də hesab edirəm ki, bütün vəkillər öz fəaliyyətində Azərbaycan Respublikasının Konstitusiyası və qanunlarına, o cümlədən, “Vəkillər və vəkillik fəaliyyəti haqqında”  qanuna,  Vəkillərin davranış qaydaları haqqında Əsasnaməyə ciddi riayət etməlidirlər.

Hər bir şəxs, xüsusilə də hüquqşünas, etdiyi hərəkətin məsuliyyətini dərk etməli, başqa şəxslərin hüquqlarını pozmamalıdır.

İmza: Quliyev Sahil Əziz oğlu                   

11 sentyabr 2019-cu il”./ovqat.com